شهامة اهل الجمالاب / ماخوذه من شعر الاستاذ / سيد احمد الحردلو

وتقول لي منو
وتقول لي شنو
نحن الساس
نحن الرأس
ونحن الدنيا جبناها وبنينها
بويت في بويت
واسعل جد الكواهلا
وخلى الفاقة .. والقاقا
تقول لي منو
تقول لي شنو
تلا ابونا بفنجري لزم
وتلا ابونا ابو ارباب
وامنا العفه والصانا
واخوي سيد السيف
والخلى الانصار تقيف
هناك ... في القيف
تقول لي منو
وتقول لي شنو
نحن الشين
ونحن الزين
نخن العقبه والعتمور
ونحن القلبه والقرعان
ونحن الشان
ونحن النان
اتينا عشان
نسوى الدنيا للانسان
تقول لي منو
وتقول لي شنو
نحن العينة والزينه
ونحن ـ اهلنا نار اهلنا سرور
وكتين ينزل المستور ترانا النور
تقول لي منو
تقول لي شنو
ونحن الجبنة والابريق
ونحن قدامنا ساواب ضيق
ونحن بيوتنا مفتوحات
مساي وصباح
ونحن وشوشنا مطروحات
مساي وصباح
و نحن البسمة والقمحة
نحن الطلة واللمة
نحن الصيد ونحن العيد
تقول لي منو
وتقولي شنو
نحن عزاز
زنحن حراز
ونحن هشاب
ونحن قموح
ونحن تمور
ونحن عيوش
ونحن النيل
وكضاب يازول منو القال انك تانيا مثيل
تقول لي شنو
وتقول لي منو
نحن الحجه والتوبه
نحن الهجره والاوبه
ونحن كتار ونحن كبار
ونحن يمين جمال الشيل
ونحن يمين نضمنا قليل
تقول لي منو
وتقول لي شنو
نحن محاية
ونحن طراية
ونحن فداية
ونحن سماية
ونحن حجاب
ونحن اللوح
ونحن شرافه في الدنيا
ونحن كتاب علم مفتوح
على كل البلودات نور
ونحن يمين مدائن نور
و وشنا نور
تقول منو وتقول لي شنو
نحن الحنه والجرتق
نحن الزفه والسيره
نحن ابشر والشبال
تقول لي شنو
وتقول لي منو
نحن العاج
ونحن الصاج
ونحن البوش
ونحن الحوش
ونحن الناس
وكتين الديار يباس
وان درت العديل والزين تعال يا زول
وان كست الكعب والشين ارح يازول
تقول لي منو
وتقول شنو
نحن السور ونحن الحور
ونحن بناتنا محروسات
ونحن ولادنا ضلالات
ونحن اماتنا ياهن ديل
ونحن ابواتنا ياهن ديل
تقول لي منو
وتقول لي شنو
نحن الخلوه والدايره
ونحن تكية العايره
ونحن الضل
ونحن الكل
ونحن سبيل غريب الليل
ونحن صباح مسافر الليل
ونحن فناجرة في الدنيا
ونحن حباب
حديثنا حباب
تعال شرف وشوفني منو
تقول لي منو
تقول لي شنو
اقيف لسع واقيف اسمع
نحن صديري منصوم ويل
نحن القرمصيص بالحيل
نحن التوب ونحن الووب
وناس حبوب
وناس حرم
ونحن اذا رأيتنا كيد تقيف طولنا وتقولو حباب
تقول لي شنو
وتقول لي منو
اقيف لسه واقيف اسمع
نحن الراية مرفوعه
ونحن الكلفه مرفوعه
ونحن حلفت مدفوعه
تقول لي شنو وتقول لي منو
اما عجبيب اما غريب
اقيف لسه واقيف اسمع
انا الجمالابي الكعب السوي الويل
وانا الجمالابي السمح بالحيل
وداير منهم ياتو
وتقول لي شنو لي منو


ماخوده من شعر الاستاذ / سيد احمد الحردلو